കോൾഡ് ഹാർബർ - 26

മൈക്കിൾ എന്നായിരുന്നു ആ ഹെയർഡ്രെസ്സറുടെ പേര്. അധികം ഉയരവും വണ്ണവും ഇല്ലാത്ത ശരീരപ്രകൃതം. ചെവിയുടെ മുകളിലേയ്ക്ക് അല്പം നീണ്ടു കിടക്കുന്ന കറുത്ത മുടിയുടെ അറ്റം കളർ ചെയ്ത് വെളുപ്പിച്ചിരിക്കുന്നു. വൃത്തിയുള്ള വസ്ത്രധാരണം. ജൂലിയ്ക്ക് നേരത്തേ തന്നെ പരിചയമുള്ള ആളാണ് മൈക്കിൾ.

 

“ഓ, യെസ്… റിമാർക്കബ്‌ൾ… റിയലി റിമാർക്കബ്‌ൾ…” ജെനവീവിനെ കണ്ട മാത്രയിൽത്തന്നെ അയാൾ പറഞ്ഞു.

 

അയാൾ തന്റെ ബ്രൗൺ നിറമുള്ള ബ്രീഫ്കെയ്സ് തുറന്നു. അതിനുള്ളിൽ നിറയെ മെയ്ക്കപ്പ് സാധനങ്ങളായിരുന്നു. ഒരു കാർഡ്ബോഡ് ഫയൽ പുറത്തെടുത്തിട്ട് അയാൾ പറഞ്ഞു. “ഞാൻ ഈ ഫയൽ നന്നായി വായിച്ചു നോക്കി… ഞാൻ കരുതിയതിനെക്കാൾ എളുപ്പമാണ് കാര്യങ്ങൾ…”

 

അയാൾ തന്റെ ഓവർകോട്ട് അഴിച്ചുമാറ്റിയിട്ട് ചീപ്പും റേസറും പുറത്തെടുത്തു. “എന്നാൽ പിന്നെ നമുക്ക് തുടങ്ങുകയല്ലേ…”

 

“ഇതിലും മിടുക്കനായ ഒരാളെ ഇനി കിട്ടാനില്ല…” ഒരു ടവൽ എടുത്ത് ജെനവീവിന്റെ ചുമലിലൂടെ പുതപ്പിക്കവെ ജൂലി പറഞ്ഞു. “വർഷങ്ങളോളം എൽസ്ട്രീ ഫിലിം സ്റ്റുഡിയോയിൽ സീനിയർ മെയ്ക്കപ്പ്മാൻ ആയിരുന്നു മൈക്കിൾ…”

 

“ശരിയാണ്…” ചീപ്പ് കൊണ്ട് അവളുടെ മുടി കോതിയൊതുക്കവെ അയാൾ പറഞ്ഞു. “സർ അലക്സാണ്ടർ കോർഡയോടൊപ്പമായിരുന്നു ഞാൻ… ഹെൻട്രി എട്ടാമനായി വേഷമിട്ട മിസ്റ്റർ ചാൾസ് ലാഫ്റ്റന് മെയ്ക്കപ്പ് ഇട്ടത് ഞാനായിരുന്നു… എളുപ്പമായിരുന്നില്ല അത്… എന്നും രാവിലെ മണിക്കൂറുകളോളം നീളുന്ന ജോലി… എന്നാൽ ഇപ്പോൾ ഈ പ്രായത്തിൽ അത്ര ബുദ്ധിമുട്ടാനൊന്നും എനിക്ക് വയ്യ… ഫാൾമൗത്തിൽ ഒരു തീയേറ്റർ ഉണ്ടെനിക്ക്… എല്ലാ ആഴ്ച്ചയും വെവ്വേറെ പരിപാടികൾ… നേവൽ ബേസ് ആയതു കൊണ്ട് ഷോ കാണാൻ ധാരാളം നാവികർ വരാറുണ്ട്… അതുകൊണ്ട് കുഴപ്പമില്ലാതെ കഴിഞ്ഞു പോകുന്നു…”

 

നിമിഷംപ്രതി താൻ ആൻ മേരി ആയി മാറിക്കൊണ്ടിരിക്കുന്നത് കണ്ണാടിയിൽ കണ്ടു കൊണ്ടിരിക്കുകയായിരുന്നു അവൾ. മുടിയുടെ കാര്യത്തിൽ മാത്രമായിരുന്നില്ല അത്. മൈക്കിളിനെ സംബന്ധിച്ചിടത്തോളം വളരെ എളുപ്പമായിരുന്നു അത്. ലിപ്‌സ്റ്റിക്കിന്റെ ഷെയ്ഡ്, കവിളിണകളിലെ റൂഷ്, കൺപീലികളിലെ മസ്കാര എന്നിവയുടെ കാര്യത്തിലൊക്കെ വളരെ ശ്രദ്ധ പുലർത്തി അയാൾ. താൻ ഇതുവരെ ഉപയോഗിച്ചിട്ടില്ലാത്ത ചാനൽ നമ്പർ 5 എന്ന പെർഫ്യൂം ആയിരുന്നു അയാൾ അവളുടെ വസ്ത്രത്തിൽ പുരട്ടിയത്.

 

ജെനവീവിൽ നിന്നും ആൻ മേരിയിലേക്കുള്ള മാറ്റം പൂർത്തിയാക്കാൻ ഏതാണ്ട് ഒന്നര മണിക്കൂർ വേണ്ടി വന്നു അയാൾക്ക്. എല്ലാം കഴിഞ്ഞതും അല്പം പിറകോട്ട് മാറിനിന്ന് വിലയിരുത്തിയിട്ട് സംതൃപ്തിയോടെ അയാൾ തല കുലുക്കി.

 

“മനോഹരം എന്ന് പറയാതെ വയ്യ…” മൊറോക്കൻ ലെതർ കൊണ്ട് നിർമ്മിച്ച ഒരു ചെറിയ മെയ്ക്കപ്പ് കെയ്സ് അയാൾ പുറത്തെടുത്തു. “നിങ്ങൾക്ക് ആവശ്യമുള്ളതെല്ലാം ഇതിനകത്തുണ്ട് ഡിയർ… എല്ലാ സാധനങ്ങളും ആവശ്യത്തിലും അല്പം അധികം പുരട്ടുവാൻ മറക്കരുത്… ഒരു പക്ഷേ, അതായിരിക്കും നിങ്ങളെ അലട്ടുന്ന ഏറ്റവും വലിയ പ്രശ്നവും… കാരണം, അങ്ങനെ അധികം മെയ്ക്കപ്പൊന്നും ഉപയോഗിക്കാത്ത കൂട്ടത്തിലാണല്ലോ നിങ്ങൾ…” ആ മെയ്ക്കപ്പ് കെയ്സ് അടച്ചിട്ട് അയാൾ ജൂലിയുടെ കവിളി തട്ടി. “ഫാൾമൗത്തിലേക്ക് പറക്കാനുള്ളതാണ്… ഇന്ന് രാത്രി ഷോ ഉണ്ട്…”

 

അദ്ദേഹത്തിന്റെ പിന്നിൽ വാതിൽ അടഞ്ഞു. കണ്ണാടിയിലെ തന്റെ രൂപത്തിലേക്ക് നോക്കി ജെനവീവ് ഇരുന്നു. “ഞാൻ തന്നെ… എന്നാൽ ഞാനല്ല താനും…” അവൾ അത്ഭുതം കൂറി.

 

ജൂലി അവൾക്ക് നേരെ ഒരു സിഗരറ്റ് നീട്ടി. “ഒരു ജിറ്റാൻ വലിച്ചു നോക്കൂ…” അവൾ അത് നിരസിച്ചതും ജൂലി പറഞ്ഞു. “നീയിപ്പോൾ ആൻ മേരിയാണ്… ഇത് വലിച്ച് ശീലിച്ചേ തീരൂ…”

 

അവൾ വാങ്ങി ചുണ്ടിൽ വച്ച സിഗരറ്റിന്റെയറ്റത്ത് ജൂലി തീ കൊളുത്തി കൊടുത്തു. പുക ഉള്ളിൽ ചെന്നതും അവൾ ഉച്ചത്തിൽ ചുമയ്ക്കുവാൻ തുടങ്ങി.

 

“ഗുഡ്… ഇനി പോയി നിന്റെ ഈ പുതിയ രൂപം ക്രെയ്ഗിനെ ഒന്ന് കാണിച്ചു കൊടുക്കൂ… നിന്നെയും കാത്ത് താഴെ ബെയ്സ്മെന്റിലുള്ള ഷൂട്ടിങ്ങ് റേഞ്ചിൽ നിൽക്കുന്നുണ്ടദ്ദേഹം…”

 

(തുടരും)